Skip to content

حەسەن مەحمود

“دەنگی ماملێ”

خوڕەی شەنگترین تاڤگەیە

هەموو ڕۆژێک کەژاوەیەک

بەڕێ دەخا لە بنارم

شەپۆلێکی تەزووهێنە

چ بخوازم یا نەخوازم

دێتە دیدەنی کەنارم.

سبەینان زوو

لە بەر پەنجەرەی ژوورەکەم

وەک شالوورێک بۆم دەخوێنێ

شەوان کیژۆڵەی جێژوانە

دەیدوێنم دەمدوێنێ

دەنگی ماملێ:

نرکە-نرکی کۆڵبەرێک و

هانکەهانکی زارۆکێکی

دوور لە زێدە

ترپە-ترپی دڵی ماندووی

دڵدارێکی نائومێدە

دەنگی ماملێ

تێشووی ئاواتی دوورەڕێی

تازەلاوێکی هەڵگوردە

هەڵۆیەکی بەرزەفڕی گەڕیدەیە

هەر ساتێک و لەسەر لووتکەی

چیایەکی بەرزی کوردە

حەسەن مەحمود

بابەتی پێوەندیدار