Get Adobe Flash player
بەڵێ بۆ سەربەخۆیی
بەڵێ بۆ سەربەخۆیی
یادی بەخێر
یادی بەخێر

بۆ خوێندنەوەی ئەم پەرتووکە دەتوانن کرتە لەسەر وێنەکە بکەن.

بازی بێریان
بازی بێریان

بۆ خوێندنەوەی ئەم پەرتووکە دەتوانن کرتە لەسەر وێنەکە بکەن.

“سووڕی دەوران”ی
“سووڕی دەوران”ی

بۆ کڕینی ئۆجیناڵی ئاڵبۆمی "سووڕی دەوران"ی مامۆستا هێمن موکریانی، پێوەندی بەم ئیمایلەوە بکەن:
info@mamle.net
یان کرتە لەسەر ئەم وێنەیە بکە.

بــــابــــەتــــی یـــەکـــەم
نووسینی:

ئەدیب و شاعیر، هونەرمەند و پێشکەشکار

بێهرووز کوردئەحمەدی

رۆژی یه‌كشه‌ممه‌ ٢١ی مانگی مای ٢٠١٧، فێستیڤاڵێكی كولتووریی هونه‌ریی له‌ خانووی ئا بێ ئێف له‌ ستۆكهۆڵمی پێته‌ختی وڵاتی سوێد به ‌ڕێوه‌ چوو.
زیاتر له‌ ٢٥٠ كه‌س، به‌ زۆریی كورد و ژماره‌یه‌ك سوێدیی به‌شداری فێستیڤاڵه‌كه‌ بوون كه‌ له‌ كاتژمێری ١٠ی به‌یانی هه‌تا ٦ی ئێواره‌ درێژه‌ی هه‌بوو.

ئه‌م فێستیڤاڵه‌ كه‌ له‌ لایه‌ن (مه‌ڵبه‌ندی هونه‌ریی ماملێ) وه‌ ڕێك خرا، بوو به‌ كۆڕێكی هونه‌ریی پڕ له‌ ده‌نگ و ڕه‌نگ و، بزه‌ و شادیی خسته‌ سه‌ر لێو و دڵی به‌شداران.
كاكڵه‌ و مه‌به‌ستی پێكهێنانی فێستیڤاڵ، ڕێز گرتن له‌ هونه‌رمه‌ندی گه‌وره‌ و خاوه‌ن كه‌سایه‌تیی، مامۆستا مه‌زهه‌ری خالقی بوو كه‌ له‌ سه‌ر بڕیاری ( مه‌ڵبه‌ندی هونه‌ریی ماملێ )، خه‌ڵاتی ٢٠١٧ی ئه‌م مه‌ڵبه‌نده‌ له‌و ڕێ و ڕه‌سمه‌ سه‌رنج ڕاكێش و پڕ له‌ خۆشه‌ویستییه‌دا پێشكه‌شی مامۆستا مه‌زهه‌ر كرا.

له‌ ساڵی ٢٠٠٩دا كه‌ (مه‌ڵبه‌ندی هونه‌ریی ماملێ) به‌ ده‌ست پێشخه‌ریی كوڕه‌كانی موحه‌مه‌د ماملێ، كاك خانه‌ و كاك وریا له‌ وڵاتی نۆرڤێژ دامه‌زرا، ئه‌م مه‌ڵبه‌نده‌ بۆ وه‌دیهێنانی ئاواته‌كانی ماملێ تێكۆشاوه‌ كه‌ هه‌ره‌گرینگیان پێكهاتنی بنكه‌یه‌كی ڕێزگر‌تن له‌ هونه‌رمه‌ندانی بواری موزیكی كوردی و هه‌روه‌ها یارمه‌تیی دان و ڕێخۆشكردن بۆ گه‌شه‌كردنی هونه‌رمه‌ندانی گه‌نج و تازه‌كاری خاوه‌ن هه‌ست و به‌هره‌ بوه‌، به‌ ئه‌ركی ڕێكخستنی كۆڕ و ئاهه‌نگی ڕێزگرتن هه‌ستێ و به‌ ده‌رفه‌ت و ئیمكانی هه‌رچه‌ند كه‌م و سنووردار، باشترین و گونجاوترین شێوه‌ بۆ ڕێزلێنان له‌ هونه‌رمه‌ندی كورد پێك بێنێ.

ئه‌م میراته‌ به‌ نرخه‌ و ئه‌م هه‌نگاوه‌ گرینگ و به‌ كاوه‌ هه‌ر له‌ ٢٠١٠ به‌م لاوه‌ به‌ كۆشش و ئه‌ركی هه‌ر دوو برای به‌ڕێز و به‌ دڵسۆزیی ژماره‌یه‌ك خه‌ڵكی تریش هاتوه‌ته‌ ئه‌نجام و تا ٢٠١٦، شه‌ش هونه‌رمه‌ندی بواری گۆرانیی و تیپێكی مۆسیقای خاوه‌ن به‌رهه‌می به‌ پێز و پیت، خه‌ڵاتی (مه‌ڵبه‌ندی هونه‌ریی ماملێ) یان پێشكه‌ش كراوه‌.
پێم خۆشه‌ لێره‌ ئاماژه‌ی پێ بكه‌م كه‌ جێی خۆی ده‌بوو ئه‌گه‌ر حكوومه‌تی هه‌رێمی كوردستان پشتی ئه‌م بنكه‌ به‌ نرخه‌ی گرتبایه‌ و له‌ هه‌موو بوارێكدا یارمه‌تیی كردبایه‌. مه‌ڵبه‌ند زۆربه‌ی كار و باری خۆی له‌ باشووری كوردستان راده‌په‌ڕێنێ و بوونی بنكه‌یه‌كی وا كه‌ مه‌به‌ستی سه‌ره‌كیی ته‌نیا و ته‌نیا گه‌شه‌پێدانی هونه‌ری موزیكی كوردییه‌، كه‌ ئێلهام و خرۆشی دڵسۆزانه‌ی له‌ ده‌نگ و هه‌ستی نه‌بڕاوه‌ و نه‌كوژاوه‌ی ماملێ سه‌رچاوه‌ ده‌گرێ، ده‌بێ و ده‌شێ جێگای ڕێز و مایه‌ی شانازیی بێ بۆ حكوومه‌تی كوردستان. ده‌شێ كه‌ ده‌سه‌ڵاتی كوردستان، بنكه‌یه‌كی وا به‌ هی خۆی بزانێ و بۆ هه‌رچی ته‌یار كردن و گه‌شه‌پێدانی، مشووری تایبه‌تیی ده‌ كار بكا. هیوای ئه‌وه‌ ده‌خوازم…

بگه‌ڕێینه‌وه‌ سه‌ر فێستیڤاڵی ستۆكهۆڵم.
هه‌ر له‌ چه‌ند مانگ له‌مه‌وبه‌ره‌وه‌ گرووپێكی دڵسۆز و شاره‌زا، به‌ دڵ و گیان و به‌ تاسه‌ و خۆشه‌ویستییه‌وه‌ چوونه‌ به‌ره‌وپیری ئه‌و مه‌به‌سته‌ و شانیان دا به‌ر ئه‌و ئه‌ركه‌.
هه‌ر دووك كوڕه‌كانی ماملێ، خانه‌ و وریا، شیرین عه‌لی، پۆڵا نانه‌وازاده‌، دیاری غه‌فووری، ئالان فتووحی و منیش بێهروز كورده‌حمه‌دی ئه‌ندامانی كۆمیته‌ی ئاماده‌كاری فێستیڤاڵ بووین كه‌ به‌ ڕێك و پێكیی و به‌رده‌وام، كۆبوونه‌وه‌ی ته‌له‌فوونی هه‌فتانه‌ له‌ سێ وڵاتی فه‌ڕانسه‌، نۆرڤێژ و سوێده‌وه‌ و دانیشتنی رووبه‌روومان بوه‌ و گشت بوار و گۆشه‌ و كه‌ناره‌كانی ئه‌و فێستیڤاڵه‌مان تاو توێ كردوه‌ و‌ له‌و ڕێگایه‌دا یارمه‌تیشمان له‌ چه‌ند دڵسۆز و هاوڕێی هه‌م ژن و هه‌م پیاو وه‌رگرتوه‌، كه‌ بۆ ئه‌ركی پراكتیكیی فێستیڤاڵێكی وا پێویسته‌.

ده‌ور و نه‌خشی هه‌ر كامه‌ له‌و هاوڕێیانه‌ جێی سه‌رنج و ئافه‌ریمه‌. هه‌ر یه‌كه‌یان به‌ شێوه‌ی خۆی و به‌ زانایی و هه‌ست به‌ به‌رپرساییه‌تییه‌كی سه‌یر، بیریان كردۆته‌وه‌ و كاریان ڕاپه‌ڕاندوه‌.
كۆبوونه‌وه‌كانمان تژیی بوون له‌ قسه‌ی خۆش و شێعر و قاقا و گیان و بزه‌ی خۆشه‌ویستیی و ره‌خنه‌ و بیر و ڕا، گۆڕین و چاكسازیی، په‌ژیوان بوونه‌وه‌ و بادانه‌وه‌ و هاتنه‌وه‌ و ده‌یان نوكته‌ی خۆش و جاری واش كه‌متر خۆش….به‌ڵام ته‌نیا شتێك كه‌ هه‌ر له‌ بیرماندا ده‌گه‌ڕا و ون نه‌ده‌بوو، ناو و هیوای ماملێ و ناز و ڕێزی خالقی بوو. هه‌ر چیمان گوت و كردمان و هێنامان و بردمان، هه‌مووی سه‌رچاوه‌ی له‌ ناو و یادی ماملێ و له‌ دلۆڤانیی به‌رامبه‌ر به‌ خالقی وه‌رده‌گرت.

خانه‌ له‌ پاریسه‌وه‌ ده‌یگوت هه‌ر چی ده‌كه‌ن و بڕیار ده‌ده‌ن من له‌ گه‌ڵتانم به‌و مه‌رجه‌ ببێته‌ هۆی ره‌زای مامۆستا خالقی.
پۆڵا به‌ پشتكار و زۆر دڵسۆزانه‌ كه‌ بزه‌ی سه‌ر زاریشی وه‌ك نه‌خشێكی هه‌میشه‌یی ده‌دره‌وشایه‌وه‌، بیر و ڕای ده‌ر ده‌خست و هاتو چووی ده‌كرد و كار و باری راده‌په‌ڕاندن.

ئالان به‌ ئاموژگاریی و پێشنیاری گونجا و له‌بار، كار ئاسانیی بۆ ده‌كردین و گرێپووچكه‌ی گا گه‌وره‌ و ڕێگری له‌ سه‌ر ڕێگامان لاده‌دا.

شیرین نه‌ك هه‌ر چركه‌یه‌ك هه‌دای نه‌ده‌دا، به‌ڵكوو جاری واش ئاگری له‌ هه‌نگاوی تا راده‌یه‌ك ماندووی پیاوانه‌ی ئێمه‌ به‌رده‌دا و وه‌خۆی ده‌خستین.
ئه‌و به‌ ئه‌زموونه‌ به‌ نرخه‌كانی كاركردنی له‌ گه‌ڵ مامۆستا مه‌زهه‌ر، بووبوو به‌ كۆڵه‌كه‌یه‌كی سه‌قامگیركرانی كاره‌كانمان.

دیاری به‌ له‌سه‌ره‌خۆیی و به‌ مه‌سئوولییه‌ته‌وه‌ هه‌رچیمان داوا ده‌كرد وه‌كوو جادوو له‌ ده‌ستی ڕاده‌دان و ده‌یخسته‌ كۆشمانه‌وه‌.

له‌ ته‌واوی ئه‌و كۆبوونه‌وه‌ و مشت و مڕ و هات و چۆ و هه‌ڵسوكه‌وته‌دا شتێك كه‌ بۆ من فره‌ سه‌رنج ڕاكێش بوو، حه‌جمینی وریای ماملێ بوو كه‌ به‌ كرده‌وه‌ ببوو به‌ به‌رپه‌ڵی هه‌موومان. حه‌جمین مان لێ ده‌بڕی به‌ڵام شلوێ نه‌ده‌بوو. داوای فڵان و فیسارمان لێده‌كرد، ده‌یكرد و ده‌نگی نه‌ده‌كرد. جاری وابوو هه‌ستم پێده‌كرد كه‌ پێی وایه‌ و ده‌بێ و ده‌شێ وه‌كوو كوڕی ماملێ زۆر له‌وه‌ زیاتر و پتر له‌ باشتر هه‌ستێ و دانیشێ، دڵ ڕاگر بێ و پشووی له‌ سه‌ر خۆی بێ و له‌ هه‌مان كاتیشدا له‌ دوو دنیای جیاوازدا خۆی ببینێته‌وه‌ و شتێك نه‌ڵێ و كارێك نه‌كا كه‌ نه‌كا هه‌م ئێمه‌ی هاوكاری و هه‌میش خه‌ڵكی دیكه‌ دڵیان لێ بێشێ. كه‌ دیاره‌ نه‌یكرد و نه‌یگوت و بارستایی و هه‌ڵكردنی بێ سنوور بوو.
منیش له‌ لاوه‌ هه‌م دنه‌م ده‌دا زیاتری له‌ سه‌ر بڕوا، هه‌میش جار به‌ جار له‌ بیرم نه‌ده‌چوو كه‌ په‌سنی بێژم و هانی بده‌م پتر بكا و زۆرتر بفڕێ. دیاره‌ وریا وه‌ك دۆم كڵاشی بۆ خۆی كردوه‌ و له‌ كوڕی ماملێش هه‌ر ئه‌وه‌ چاوه‌ڕوان ده‌كرێ.

نازانم چۆن باسی ئه‌م خۆشه‌ویستانه ی هاوكاری رۆژانی هاریكاریی‌ بكه‌م كه‌ دڵم ئاو بخواته‌وه‌ و ئارامیم بگاتێ. ته‌نیا ده‌توانم ئه‌وه‌ بڵێم كه‌ به‌ بوون و هه‌بوونیان شانازیی ده‌كه‌م و له‌و ماوه‌یه‌دا زۆر شتیان لێ فێر بووم. هه‌موویان به‌ پانه‌وه‌ كاریان كرد و نیشانیان دا كه‌ لایه‌نگر و گیرۆده‌ی هونه‌رن و هه‌رگیز نیشانه‌ی به‌یایی و مانوویه‌تییم پێیانه‌وه‌ نه‌دیت. باشترین ئاواته‌كانی خۆشیی و سه‌ركه‌وتنیان بۆ ده‌خوازم….

ڕێكلام بۆ فێستیڤاڵ له‌ زۆر جێگا و بواره‌وه‌ كرا و له‌ ڕێگای فه‌یسبووك و مه‌یل و مه‌ساژ و ته‌له‌فون و هه‌روه‌ها چه‌ند رادیۆ و تێلڤیزیۆنه‌وه‌ بڵاو كرایه‌وه‌، به‌ڵام ئه‌وه‌ نه‌بوو كه‌ ده‌بوو كرابایه‌. راده‌ی رێكلام و ئاگادارییمان كه‌مو كووڕی تێدا بوه‌.

سێ رۆژ پێش فێستیڤاڵی رێز گرتن له‌ خالقی، له‌ لایه‌ن (تێلڤیزیۆنی ئازادی) یه‌وه‌ له‌ پرۆگرامی( رۆنیا ) به‌رنامه‌یه‌ك ڕێك خرا كه‌ له‌ودا خاتوو شیرین و من به‌شدار بووین و به‌ ماوه‌ی كاتژمێرێك باسی فێستیڤاڵ و ( مه‌ڵبه‌ندی هونه‌ریی ماملێ ) و ( ئه‌نستیتووتی كه‌له‌پووری كورد ) مان كرد. به‌ڕێوه‌به‌ری پڕۆگرامی ڕۆنیا‌ ‌ برای خۆشه‌ویستی هونه‌رمه‌ندم كاك نه‌جمه‌ی غوڵامی بوو كه‌ لێره‌شدا پڕ به‌ دڵ سپاسی هه‌م ئه‌و و هه‌میش تێلڤیزیۆنی ئازادی و كاربه‌ده‌ستانی ڕۆنیا ده‌كه‌ین.

رۆژی فێستیڤاڵ، هه‌وڵدان و ڕاكردن و ئاره‌قه‌ ڕشتنی شیرین دیمه‌نێكی هانده‌ری هه‌بوو. ده‌بوو ده‌سپێكی فێستیڤاڵ كه‌ پیشانگا و دانان و ڕانانی به‌رهه‌مه‌ به‌ نرخه‌كانی ( ئه‌نستیتووتی كه‌له‌پووری كورد ) به‌ وێنه‌ و تابلۆ و فیلم و ده‌یان شتی تر بوو، بگاته‌ ئه‌و په‌ڕی وشه‌ی ڕێكو پێكیی. كه‌ دیاره‌ هه‌ر واشی لێهات و به‌ یارمه‌تیی هاوڕێیان، پیشانگا كه‌وته‌ به‌ر چاو و به‌ ڕازاوه‌یی بوو به‌ یه‌كه‌م نه‌زه‌رگه‌ی میوانان كه‌ به‌ره‌ به‌ره‌ ده‌گه‌یشتنه‌ جێ.

سێمیناری فێستیڤاڵه‌كه‌مان كه‌ به‌ به‌شداریی مامۆستا مه‌زهه‌ر و هه‌روه‌ها مامۆستا هاشم ئه‌حمه‌دزاده‌ ده‌ستی پێكرد، له‌ لایه‌ن گه‌نجی هونه‌رمه‌نده‌وه‌ پێدرام شه‌هلایی پێشكه‌ش كرا كه‌ به‌ خوێندنه‌وه‌ی كورته‌ ژینامه‌ی هه‌ر دوو به‌ڕێزیان كه‌وته‌ گه‌ڕ.
دوكتۆر ئه‌حمه‌دزاده‌ به‌ لێكدانه‌وه‌یه‌كی زانستییانه‌ له‌ سه‌ر شوێن و كارتێكه‌ریی مۆسیقای كوردی له‌ مانه‌وه‌ی نه‌ته‌وه‌یی كورددا به‌ زمانێكی ره‌وان و له‌ بار و به‌ ناوه‌رۆك، كاكڵه‌ی مه‌به‌ستی به‌ ده‌سته‌وه‌ دا.
پاشان مامۆستا مه‌زهه‌ر، ئه‌و هونه‌رمه‌نده‌ زانا و خوێنده‌واره‌ و ئه‌و ده‌نگه‌ ئه‌فسووناوییه‌، به‌ وتاری له‌باری خۆی نیشانی دا كه‌ خالقی بۆچی دڵ و هه‌ستی خه‌ڵكی به‌ تاڵان بردوه‌.

فیلمی (مه‌ڵبه‌ندی هونه‌ریی ماملێ) وه‌ك مێژوویه‌كی هونه‌ریی له‌ ماوه‌ی چه‌ند خوله‌كدا ده‌ریایه‌ك هه‌ست و ئاسمانێك مه‌به‌ستی به‌ ده‌سته‌وه‌ دا.

هه‌روه‌ها فیلمی سه‌باره‌ت به‌ مێژوو و ده‌سكه‌وته‌ به‌ بایه‌خه‌كانی ( ئه‌نستیتووتی كه‌له‌پووری كورد )یش كه‌ هه‌م دامه‌زرێنه‌ر و هه‌م ڕابه‌ری مامۆستا مه‌زهه‌ری خالقی یه‌، به‌ ته‌واوه‌تیی نیشانی دا كه‌ خولیا و بیر و ئاواته‌كانی له‌ مێژینه‌ی خالقی چۆن كۆ بوه‌ته‌وه‌ و هه‌ر به‌ ڕزگاربوونی به‌شێكی خاكی نیشتمانی كورد، ئه‌و ئاواتانه‌ كه‌ كۆكردنه‌وه‌ و دامه‌زراندنی بنكه‌یه‌كی كولتووریی بۆ پاراستن و پێشخستنی كه‌له‌پووری نیشتمانییه‌، چۆن خۆی گرتوه‌ و بوه‌ته‌ سه‌رچاوه‌ بۆ به‌كارهێنانی زانایان و لێكۆڵه‌رانی بواری كولتووری مووزیك و هونه‌ری كورده‌واریی.

هونه‌رنواندنی پێدرام شه‌هلایی به‌ ڤیالۆن سه‌رنج ڕاكێش و چاوه‌ڕواننه‌كراو بوو.
هه‌ر وه‌ك هونه‌رنواندنی شاعێر و مووزیكزانی سوێدیی ئینگمار ئولسۆن به‌ گیتار و گۆرانیی كه‌ بوو به‌ هۆی حه‌سانه‌وه‌ی دڵ و زاخاوی مێشك.

پرسیاری به‌ جێ و جاری واش به‌ ره‌خنه‌ له‌ لایه‌ن میوانانه‌وه‌ ئاراسته‌ كران كه‌ مامۆستایان خالقی و ئه‌حمه‌دزاده‌ وه‌ڵامیان دانه‌وه‌.

هه‌روه‌ها فیلمی تایبه‌تیی مووزیك و كولتووری ئیزه‌دییه‌كان بڵاو كرایه‌وه‌ كه‌ یه‌كێك له‌ كاره‌ هه‌ره‌ به‌نرخه‌كانی ( ئه‌نستیتووتی كه‌له‌پووری كورد) ه‌ كه‌ بۆ دروستكردنی، هێز و ئه‌رك و تێكۆشانێكی له‌ راده‌به‌ده‌ر به‌ كار هێنراوه‌.

یه‌كێك له‌ خاڵه‌ جێ سه‌رنجه‌كانی فێستیڤاڵ، به‌شدارییكردن و قسه‌كانی دوكتۆر سالار عوسمان جێگری وه‌زاره‌تی ڕۆشنبیریی حكوومه‌ تی هه‌رێمی كوردستان بوو كه‌ به‌ باوه‌ڕی من به‌ وته‌ی حه‌كیمانه‌ و به‌ ناوه‌رۆك، زۆر به‌ ڕێ و جێ دوا و جێگه‌ و پێگه‌ی ماملێ و خالقی له‌ جیهانی مۆسیقای كوردیدا به‌ جوانیی نواند. هیوادارم نموونه‌ی به‌ڕێزی له‌ حكوومه‌تی هه‌رێم دا زۆر بێ.
باسی دیارییه‌ به‌نرخه‌كانیشی هه‌م بۆ ( مه‌ڵبه‌ندی هونه‌ریی ماملێ ) و هه‌م بۆ مامۆستا مه‌زهه‌ر با له‌و لاوه‌ بوه‌ستێ.

چه‌ند به‌ڕێزی دیكه‌ش، شاعێر و ئه‌دیب كاك ناسر حسامی، گۆرانیبێژی به‌ هه‌ست كاك نه‌جمه‌ی غوڵامی و رۆژنامه‌وان هه‌ڤاڵ كوردۆ باكسی قسه‌ی به‌ نرخیان كرد و ره‌خنه‌شیان گرت و كۆڕیان ده‌وڵه‌مه‌ند كرد.

وته‌كانی سه‌رۆكی ( مه‌ڵبه‌ندی هونه‌ریی ماملێ )، كاك خانه‌ی ماملێ خاڵێكی تری گه‌شاوه‌ی فێستیڤاڵی ڕێزلێنان له‌ خالقی بوو.
خانه‌ به‌ لێكدانه‌وه‌ی جوان و به‌ وشه‌ و واژه‌ی مه‌تین و پڕناوه‌رۆك، په‌یامی خۆشه‌ویستیی ماملێ و خالقی كرده‌ یه‌ك و هه‌وای له‌ باری ئه‌و ئاهه‌نگه‌ی ره‌وانتر كرد. كاك خانه‌ هه‌روه‌ها وه‌ڵامی چه‌ند ره‌خنه‌ی ئاراسته‌كراویشی دایه‌وه‌.

هه‌ر چه‌ند كه‌ ( مه‌ڵبه‌ندی هونه‌ریی ماملێ ) جارێ هه‌ر هه‌موو ئه‌رك و كاره‌كانی له‌ چوارچێوه‌ی بنه‌ماڵه‌ی ماملێ ده‌رنه‌چوه‌، به‌ڵام به‌ حه‌ق وه‌ك ڕێكخراوێكی ڕێكو پێك و هه‌ڵسووڕ و سه‌ربه‌خۆ و بێلایه‌ن هاتۆته‌ به‌ر چاو و خانه‌ی ماملێ به‌ ڕێ و جێ به‌رپرسایه‌تیی وه‌ستۆ گرتوه‌ و به‌ كرده‌وه‌ش ده‌زانم كه‌ به‌شێكی یه‌كجار زۆری كار و ئه‌ركی مه‌ڵبه‌ند له‌ سه‌ر شانی پان و دڵی گه‌وره‌ و گیرفانی كه‌ریم و هه‌ستی هه‌راوی وریا ده‌گه‌ڕێ.
بۆ ڕێكخستنی كاره‌كانی هه‌ر بنكه‌یه‌ك، یه‌كێك له‌ بنه‌ماكانی مانه‌وه‌ و به‌رده‌وام بوونی، پشتیوانیی ئابوورییه‌ كه‌ ده‌بێ بڵێم به‌ داخه‌وه‌ له‌ پێوه‌ندیی له‌ گه‌ڵ ( مه‌ڵبه‌ندی هونه‌ریی ماملێ )، ئه‌و ئه‌ركه‌ گرانه‌، گرانایی خۆی خستوه‌ته‌ سه‌ر گیرفانی ئه‌و دوو برا له‌ باره‌ و به‌ تایبه‌تیی برای گه‌نجتریان چالاك ماملێ.
ئه‌وان نه‌یانویستوه‌ و نایانه‌وێ سه‌ربه‌خۆیی مه‌ڵبه‌ند و ناوی ناوداری ماملێ بخرێته‌ ژێر پرسیاره‌وه‌. یارمه‌تیی ئابووریی كه‌س قبووڵ ناكه‌ن و ئه‌وه‌ی من بیزانم هێشتا حكوومه‌تی كوردستان ئاوڕی خێری له‌ مه‌ڵبه‌ند نه‌داوه‌ته‌وه‌.
ده‌زانین كه‌ به‌ ئیشاره‌یه‌ك، ده‌یان هه‌زار له‌ لایه‌نگرانی ده‌نگی ماملێ ئاماده‌ن هه‌رچی پێویست بێ یارمه‌تیی بكه‌ن، به‌ڵام وه‌ڵامی خانه‌ و وریا هه‌ر ئه‌وه‌ بوه‌ كه‌ پێشتر گوتوویانه‌.
له‌ گه‌رمه‌ی ئاماده‌كردنی فێستیڤاڵدا بۆ نموونه‌ نوێنه‌رایه‌تیی حكوومه‌تی هه‌رێمی كوردستان له‌ وڵاتی سوێد به‌ ره‌سمیی داوای كرد كه‌ ڕێگا بدرێ دراوی به‌ كرێگرتنی هۆڵی ئا بێ ئێف كه‌ پاره‌یه‌كی كه‌میش نه‌بوو، وه‌ك یارمه‌تییه‌ك له‌ لایه‌ن ئه‌وانه‌وه‌ بدرێ، كه‌ ئه‌ویش له‌ لایه‌ن كاك خانه‌وه‌ وێڕای سپاس قبووڵ نه‌كرا.
له‌ بیرم نه‌چێ كه‌ نوێنه‌ری حكوومه‌تی هه‌رێم له‌ سوێد له‌ فێستیڤاڵ دا به‌شدار بوو و باقه‌ گوڵێكی جوان و ره‌نگینیشی پێشكه‌ش كرد.

گه‌لۆ….به‌شی سێهه‌م و كۆتایی فێستیڤاڵ، ڕێ و ڕه‌سمی پێشكه‌ش كردنی خه‌ڵاتی ( مه‌ڵبه‌ندی هونه‌ریی ماملێ ) به‌ مامۆستا مه‌زهه‌ر بوو.
خه‌ڵاته‌كه‌ به‌ سێ پارچه‌ دابه‌ش كرابوو. یه‌كه‌میان مه‌داڵیای تایبه‌تیی بوو كه‌ له‌ لایه‌ن سه‌رۆكی مه‌ڵبه‌ند كاك خانه‌ی ماملێ و له‌ نێو چه‌پڵه‌ڕێزانی به‌شداراندا پێشكه‌شی مامۆستا مه‌زهه‌ر كرا.

پارچه‌ی دووهه‌م چه‌پكه‌ گوڵێكی به‌ دانسته‌ بوو كه‌ به‌ ده‌ستی شاعێر و هونه‌رمه‌ندی سوێدیی ئینگمار ئولسۆن پێشكه‌شی خالقی كرا.

سێهه‌م و دوا پارچه‌ی خه‌ڵاتی ماملێ، لەوحەی ڕێزلێنانی ئەو ناوەندە بوو کە لە لایه‌ن به‌ڕێز دوكتۆر عومه‌ر شێخ مووس، سیاسه‌تزان و مامۆستای زانكۆی ستۆكهۆڵمه‌وه‌ پێشكه‌ش به‌ مامۆستا مه‌زهه‌ر كرا.
سه‌رنج ڕاكێش بوو كه‌ به‌ پێی نه‌ریتی مه‌ڵبه‌ند، بێجگه‌ له‌ كاك خانه‌، ئه‌وانه‌ی كه‌ به‌شه‌كانی تری خه‌ڵاتیان پێشكه‌ش كرد نه‌یانده‌زانی كه‌ ئه‌ركێكی وایان له‌ به‌رده‌مدایه‌. ته‌نانه‌ت دوكتۆر شێخ مووس به‌ سرته‌ پێی گوتم بۆچی پێشتر ئاماژه‌یه‌كم پێ نه‌داوه‌!

پشتی پێشكه‌شكرانی خه‌ڵاتی ٢٠١٧ی ( مه‌ڵبه‌ندی هونه‌ریی ماملێ )، مامۆستا مه‌زهه‌ری خالقی له‌ وته‌یه‌كی كورت به‌ڵام پوخت دا بۆ نموونه‌ فه‌رمووی به‌ ده‌ستی به‌تاڵ هاتم و به‌ ده‌ستی پڕ ده‌گه‌ڕێمه‌وه‌.
به‌ شانازییه‌وه‌ باسی خه‌ڵاته‌كه‌ی كرد و به‌ دلۆڤانییه‌وه‌ یادی ماملێ ی كرده‌وه‌ و له‌ گه‌ڵ سپاس له‌ ( مه‌ڵبه‌ندی هونه‌ریی ماملێ )، شادمانیی خۆی له‌ بوون له‌ فێستیڤاڵی ستۆكهۆڵم دا ده‌ربڕی و هیوای سه‌ركه‌وتنی بۆ مه‌ڵبه‌ند خواست. كاك مه‌زهه‌ر هه‌روه‌ها تابلۆیه‌كی جوان و سه‌مبولیكی پێشكه‌ش به‌ مه‌ڵبه‌ند كرد.
دیاره‌ له‌وێ ده‌بوو وه‌بیری مامۆستا مه‌زهه‌ر بێنینه‌وه‌ كه‌ ئه‌و هه‌رگیز ده‌ستی به‌تاڵ نه‌بوه‌ و ئه‌گه‌ر مووزیكی كوردیی له‌ فه‌وتان پارێزراوه‌ و له‌ زۆر بواره‌وه‌ و به‌ تایبه‌تیی له‌ بواری پێشكه‌وتن و گه‌شه‌كردندا سه‌ركه‌وتوویه‌، به‌شێكی به‌رچاوی ده‌گه‌ڕێته‌وه‌ بۆ ده‌یان ساڵ ستران چڕین و خوێندنی خالقی و خولقاندن و ئافراندنی ده‌یان شاكاری بێ وێنه‌ و هه‌تا هه‌تایی كه‌ هه‌م شێعر و هه‌م ئاهه‌نگ و هه‌میش ده‌نگه‌ سێحراوییه‌كه‌ی ئه‌و بوون به‌ خه‌و و خه‌یاڵ و له‌ دڵ و گیاندا ده‌گه‌ڕێن.

ڕێك كه‌وتن و به‌ڕێوه‌ چوونی فێستیڤاڵی رۆژی ٢١ی مای ٢٠١٧ بێ كه‌م و كووڕیی نه‌بوو و ئه‌و ڕه‌خنه‌ و بیر و ڕا و پێشنیارانه‌ كه‌ دواتر له‌ ماوه‌ی ئه‌م دوو سێ هه‌فته‌یه‌دا بۆ كۆمیته‌ی ئاماده‌كار هاتوون، ده‌بنه‌ مه‌شغه‌ڵ و ڕێ پیشانده‌ری كار و باری داهاتوو.
له‌ به‌ره‌ به‌ری فێستیڤاڵدا، ده‌ركه‌وتنی دووبەرهەمی کۆن و ناوازە بوو لە مامۆستایان ماملێ (پاشی ۲٥ ساڵ) و مامۆستا هێمن (پاشی ٤۱ساڵ) بە شێوەی سێدێ کە ئامادە کرابوو تا لەو ڕۆژە دا بڵاو بکرێتەوە. تێچووی دروستكردن و ژیاندنه‌وه‌ی ئه‌و به‌رهه‌مه‌ له‌ لایه‌ن مەڵبەندی هونەریی ماملێ وه‌ دابین كرابوو. شتێكی كه‌ ئێستاش جێگای داخه‌ ئه‌وه‌ بوو كه‌ له‌ گه‌رمه‌ و زرمه‌ی ڕاپه‌ڕاندنی فێستیڤاڵ دا، له‌ بیرمان چوو باسی بكه‌ین و ڕێزی ئه‌و كه‌سانه‌ بگرین كه‌ كاره‌كه‌یان گه‌یاندبوه‌ ئه‌نجام، كه‌ یه‌كێكیان كاك فاروق فه‌رهاد، کاک کەریم تەلایی، کا کەریم حەداد و خەجیج خانمی هاوسەری کاک کەریم حەداد بوو. كاری ناوبراوان جێگای ڕێز و مایه‌ی قه‌درزانینه‌.
دیاره‌ ڕێكلام بۆ ئه‌و سی دی یه‌ نازداره‌ هه‌ر له‌ ڕێگای فه‌یسبووكه‌وه‌ سه‌دان هه‌زار كه‌سی گرتۆته‌وه‌.
به‌ڵام داخ و ره‌خنه‌یه‌كی گرینگتر كه‌ هه‌م من و هه‌میش كۆمیته‌ی ئاماده‌كاری فێستیڤاڵ ده‌گرێته‌وه‌ ئه‌وه‌یه‌ كه‌ به‌ درێژا‌یی كاتژمێره‌كانی ئه‌و ڕۆژه،‌ تاقه‌ جارێكیش ده‌نگی به‌ زه‌نگ و سۆزی ماملێ و خالقی بڵاو نه‌كرایه‌وه‌. ئه‌وه‌ هه‌ر چه‌ند هۆی خۆی هه‌بوو به‌ڵام ئێستا ئیتر پێویست به‌ باسكردن ناكا. شتێك بوو له‌ ده‌ست ده‌رچوو كه‌ هیوادارم هه‌رگیز دووپات نه‌بێته‌وه‌.

له‌وێ گوتمان و لێره‌ش دووباره‌ی ده‌كه‌مه‌وه‌ كه‌ له‌ لاوه‌ گه‌لێ كه‌س یارمه‌تییان كرد بۆ ئه‌وه‌ی فێستیڤاڵ به‌ سه‌ركه‌وتنه‌وه‌ پێشكه‌ش بكرێ، كه‌ دیاره‌ هه‌ر واشی لێهات.
به‌شی تێكنیكی ده‌نگ و ره‌نگ سه‌ره‌ڕای چه‌ند كێشه‌یه‌كی نه‌خوازراو به‌ سه‌رپه‌رستیی كاك ئازاد بانه‌یی ده‌وری تایبه‌ت و گرینگی خۆی گێڕا. هه‌ر وه‌ها هاوكارانی كاك ئازاد، خاتوو له‌یلا موحه‌مه‌دی و كاك جه‌ماڵ فه‌تحیان به‌ كاری ڕێكو پێكی فیلم هه‌ڵگرتن، شوێنێكی بێ ئه‌ملا و ئه‌ولایان له‌ تۆمار كردنی سات به‌ ساتی رووداوه‌كانی فێستیڤال دانا و یادگارێكی به‌ نرخیان به‌ دیاریی پێداین.

چه‌ند رادیۆ و تێلڤیزیۆن هاتن و وتو وێژیان له‌ گه‌ڵ مامۆستا مه‌زهه‌ر و كاك خانه‌ ، هه‌ر وه‌ها له‌ گه‌ڵ چه‌ند كه‌س له‌ میوانان كرد.

رۆژنامه‌وان كاك ئاسۆ موكریانی ئه‌ركی راپۆرت نووسین له‌ سه‌ر چۆنییه‌تی كاری فێستیڤاڵی به‌ ئه‌ستۆ گرت.

كاك خولە ڕەحیم  وه‌كوو پێخۆشبوون ژماره‌یه‌كی به‌رچاو شه‌ربه‌تی پێشكه‌ش به‌ میوانانی فێستیڤاڵ كرد.

 ڕازاندنه‌وه‌ی شانۆ و جوانکردنی بە گوڵ، هه‌ر وه‌ها پێشكه‌شكردنی چه‌پكه‌ گوڵ به‌ میوانانی بانگ كراو بۆ سه‌ر شانۆ، خاتوونه‌كان وه‌فا و سه‌فای ماملێ گرتبوویانە سەر ئەستۆی خۆیان و بەم چەشنە سۆزی میوانداریی و خانه‌خۆیی یان به‌ جێ گه‌یاند.

نابێ له‌ بیرم چێ بینووسم كه‌ هه‌ر زوو بڕیارمان دابوو بۆ به‌ڕێوه‌بردنی پرۆگرامی فێستیڤاڵ هه‌م ژن و هه‌م پیاوێك ئه‌و ئه‌ركه‌ بگێڕن. كۆشش و گه‌ڕان و هه‌وڵدانمان بۆ په‌یداكردنی خانمێكی شایانی ئه‌و كاره‌ دادی نه‌دا و سه‌ری نه‌گرت. ناچار سێ چوار رۆژ پێش كاتی فێستیڤاڵ، داوام له‌ كیژی نازدارم ته‌وار گیان كرد كه‌ له‌و باره‌وه‌ یارمه‌تییمان بدا. به‌ شانازیی و باوه‌شی ئاواڵه‌وه‌ به‌ڵێنیی دا و شان به‌ شانی من، به‌ زمانی سوێدیی ده‌قی خاڵه‌كانی به‌رنامه‌ی پێشكه‌ش كرد و بارێكی قورسی له‌ سه‌ر شانمان لا برد.

سپاسێكی زۆر و زه‌به‌ند بۆ ئه‌و ره‌خنه‌ و پێشنیارانه‌ كه‌ دوایه‌ ئاراسته‌مان كرا، كه‌ بێ شك ده‌بنه‌ مه‌شخه‌ڵی رێگای چاكسازیی له‌ كاره‌كانی داهاتوودا.

سپاسێكی بێ سنووریش بۆ ئه‌و گشته‌ ده‌ستخۆشیی و ئافه‌ریم و قه‌درزانینانه‌ كه‌ له‌ لایه‌ن سه‌دان كه‌سه‌وه‌ هه‌تا ئێستاش به‌ وتن و مه‌یل و ته‌له‌فون و له‌ ڕێگای فه‌یسبووكه‌وه‌ بۆ كۆمیته‌ی به‌ڕێوه‌ به‌ر و (مه‌ڵبه‌ندی هونه‌ریی ماملێ) هاتووه‌.

خۆم زۆر به‌ به‌خته‌وه‌ر زانی كاتێك سه‌رۆكی مه‌ڵبه‌ند، هاوڕێ و برای خۆشه‌ویستم خانه‌ی ماملێ له‌ سه‌ر شانۆ په‌سنی كار و ئه‌ركی منی دا. هه‌ر وه‌ك له‌وێش باسم كرد، ئه‌ركی سه‌ر شانم بوو كه‌ وه‌ك گیرۆده‌ی ده‌نگی خالقی و شه‌یدای سۆزی ماملێ، هه‌رچیم له‌ ده‌ست هاتبێ بیكه‌م.
كاك خانه‌ دوایه‌ش به‌ نامه‌ی سه‌راسه‌ر مێهر و دلۆڤانیی سپاسی كردووم كه‌ منیش به‌ هه‌مان شێوه‌ وه‌ڵامی كوڕی هێژای ماملێم داوه‌ته‌وه‌، كه‌ دوایه‌ش ده‌قی هه‌ر دووك نامه‌كان لێره‌ له‌ سه‌ر سایتی ماملێ به‌ یادگار داده‌نێم.

ده‌زانم كه‌ مامۆستای مه‌زن و برای گه‌وره‌ی جاران و ئێستام كاك مه‌زهه‌ر، به‌ شادیی و ڕه‌زایه‌ته‌وه‌ گه‌ڕایه‌وه‌ وڵات. مه‌به‌ستیش هه‌ر ئه‌وه‌ بوو كه‌ مامۆستا به‌ ته‌واویی هه‌ست پێ بكا كه‌ فێستیڤاڵی ستۆكهۆڵم ته‌نیا بۆ ڕێزلێنان له‌ ئه‌و و هه‌نگاوه‌ به‌نرخه‌كانی ژیانی هونه‌ریی و فه‌رهه‌نگیی نه‌ته‌وه‌یی ئه‌و ڕێك خرا.

هاوكات ته‌واوی ساته‌كانی رۆژی فێستیڤاڵ له‌ ده‌سپێكه‌وه‌ هه‌تا ئه‌نجام هه‌ستم ده‌كرد كه‌ گیانی پاكی ( ماملێ )ش له‌ گۆشه‌ گۆشه‌ی ئه‌و ئاهه‌نگه‌دا ده‌فڕێ و بزه‌ تاقانه‌كه‌ی هه‌ر له‌ سه‌ر لێوانه‌ و به‌ گوێماندا ده‌سرتێنێ كه‌….ئافه‌ره‌م…چاكوو ڕاپه‌ڕاند….ده‌ستوو خۆش….هه‌ستوو خۆش…….

جا چ پاداشێك له‌وه‌ به‌نرختر هه‌یه‌ كه‌ ئێمه‌ وه‌رمان نه‌گرتوه‌….؟!

به‌ سپاسه‌وه‌…. بێهروز كورده‌حمه‌دی
سوێد ١٠ی یوونی٢٠١٧

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــ
ــــــــــــــــــ

بـــابـــەتـــی دووهـــەم

 

ئاسۆ موکریانیڕاپرسی

ئامادە کردنی رۆژنامەنووس و چالاکی سیاسی: 
ئاسۆ موکریانی
لە سەر بەڕێوەچوونی فستیڤاڵی
[خەڵاتی مەڵبەندی هونەریی ماملێ] لە شاری ستۆکهۆڵم.
بەڕێزان !
پێشەکی ڕێز و دەستخۆشی خۆمان بۆ ئەرک و دڵسۆزی بەڕێوەبەرانی فستیواڵی [ خەڵاتی مەڵبەندی هونەریی ماملێ ]، کە داهێنانێکی بەنرخ و شانازییەکی کولتووری نەتەوەییمانە، ڕادەگەیەنین و هیوای بەردەوامی و سەرکەوتنیان بۆ دەخوازین.
ڕێ و ڕەسمی خەڵاتی هەشتەمین ساڵی تێکۆشانی ئەم مەڵبەندە هونەرییە، لە ڕۆژی یەکشەممە، ڕێکەوتی
٢١-٥ -٢٠١٧ لە شاری ستۆکهۆڵم پایتەختی وڵاتی سۆئێد، بەڕێوە چوو.
 
بەشێک لە هاووڵاتیان بە هاتن لە شوێنی دوور و نزیکەوە ، ئەویندارانە ئامادە بوون و ڕێزیان لە کولتوور و موزیک و هونەریی ، هونەرمەندانی ڕەسەن و خۆشەویستی گەلەکەمان، مامۆستایان ماملێ و خالەقی، گرت. هەر وەکی پێشتر مامۆستا مەزهەری خالەقی دیاری کرابوو، لەو ئاهەنگە شایستەیەدا خەڵات کرا.
بەم بۆنەوە ، پیرۆزبایی ئاراستەی بەڕێز مامۆستا مەزهەری خالەقی و سەرجەم هاووڵاتیانمان لە کوردستان و هەندەران دەکەین.
مەبەستم لە ئامادە کردنی ئەم ڕاپرسییە، وەرگرتنی بیر و ڕای ئامادە بووانی هێژا بوو، لە سەر بەڕێوەچوونی فستیواڵەکە.
بەو هیوایە کە خزمەتێکی کەمی ئەو بنیاتە کلتوورییە تاقانەیە بکات ، بۆ باشتر بەڕێوەبردنی ئاهەنگەکانی، لە ساڵەکانی داهاتوودا.
تێبینی :
ناوی [ مەڵبەند ] لە بواری جوغرافیا / جوگرافیاوە شوێن- ە ، جێگا- یە./
ناوی ئینگلیزییەکەی، ” سەنتەر “ە ، کە کوردییەکەی ” ناوەند “ە و گونجاوترە./ هەر بۆیە پێشنیار دەکرێت کە ناوی :
[ مەڵبەندی هونەری ماملێ ]، بکرێت بە [ ناوەندی هونەری ماملێ ].
بە سپاسەوە بۆ ئەو بەرێزانەش کە لە ڕاپرسییەکەدا بەشدار بوون، وڵامی خۆیان بەم جۆرە داوەتەوە :
١- بیرۆکەی دامەزراندنی [ مەڵبەندی هونەریی ماملێ ]، تان پێچۆنە ؟
وەڵام :
کارێکی یەجگار بە نرخە، کە هەتا ئێستا باو نەبووە، بە ناوی هونەرمەندێک کە سێ بەرەی پەروەردە کردووە . گوێیان لێبووە و پێیان خۆش بووە./
ناوەند ، لە جیاتی مەڵبەند گونجاوترە./
بیرۆکەیەکی زۆر باشە. / هەر وەکی وڵاتان و خەڵکانی دیکە، قەدری هونەرمەندان و گەورەکانی کولتووری خۆمان بزانین و بۆ داهاتووش بۆ هونەرمەندان و خەڵکی زۆر باشە./ خەباتێکی فەرهەنگسازییە، کە بە چاوی حورمەتەوە سەیری هونەر و کولتوور بکەین، کە پێشتر نەمانزانیوە و نەمانتوانیوە قەدری شتەکانی خۆمان بگرین . /
بنیاتێکە بۆ نەوەی داهاتوو. / بۆ مێژووی کورد، بە تایبەت لە ناوچەی موکریان بۆ کوردستان دەمێنێتەوە. /
کاری باشە. / لە لای ئێمە زۆر گرفت هەیە. هەم ناوی دەمێنێت و هەم خەڵاتەکەش هاندەرە بۆ هونەرمەندانی دیکە. /
زۆر باشە، بەتایبەت بۆ ئەو هونەرمەندە بەڕێزانەی کە لە ژیان دان و ڕێزیان لێدەگیرێت. باشتر دەناسرێن و زانیاری زیاتریان لێدەست دەکەوێت. /
زۆر باشە کە لە ڕێگای ئەم مەڵبەندە ، ڕێز و حورمەت لە کەسایەتی ماملێ ی نەمر دەگیردرێت./ زۆر شیاو و گونجاوە کە خەڵاتی هونەرمەندێکی ڕابردوو، دەدرێت بە هونەرمەندێکی دیکە./ هەر وەکوو خەڵاتەکانی :
پۆلار ، لە لایەن بنەماڵەی ئابا ، ستیگ ئاندرسۆن، لە سۆئێد. /
خەڵاتی نۆبێل ، لە نۆڕۆێژ و لە سۆئێد ،کە پاشا، لە ستۆکهۆڵم سەرپەرەستی دەکات./
یان خەڵاتەکانی ئۆسکار، کان ، هەروەها ئەوانی دیکەش لە وڵاتانی دیکە ./
ناوی ماملێ، ی زیاتر بەرجەستە کردووە./ هەم قەدری هونەرمەندانی دیکەمان دەگیرێ، هەم ناوی هونەری ماملێ، بەرز و بەڕێز ڕادەگرێ./
٢- راگەیاندن و ڕێکلامی فستیواڵەکە چۆن بوو ؟
وەڵام :
راگەیاندن باش نەبوو/ باش بڵاو نەبۆتەوە / بە گوێرەی پێویست نەبوو./ زیاتر لە ناو بەشێکی کەمی دۆستان و ئاشنایان دابووە./
بەشێک لە خەڵکی، وایان زانیوە کە هەر بانگهێشتنی تایبەتی بووە ./
زۆر بەربڵاو نەبوو. / خەڵکی زۆر نەیان زانیبوو./ زۆر کەس تەنانەت لە وڵاتانی دیکەش دەیانویست بێن، بەڵام نەیان بیستبوو. /
راگەیاندنەکە زۆر ڕوون نەبوو./ وردەکاری بەشەکانی دیار بان باشتر دەبوو. /
لاواز بوو. / هەر چەند ئەندامانی کۆمیتەکە زۆر بوون، بەڵام ڕێکلامی باش نەکرابوو. /
زۆربەی هونەرمەندان و ژەنیارەکان کە لە سۆئێدن، لە ئاهەنگەکەدا دیار نەبوون./ ئەو تلەڤزیۆنانەی ئاگادار بوون، لە ڕاگەیاندندا کەمتەرخەم بوون./
ئافیشەکە، لە لایەن کۆمیتەی ئامادەکار، دروستکراوە./ خەباتی گشتی فەیسبووکی بۆکراوە./ هەرەوەزێک بووە بۆ بەڕێوەبردن، بە تەلەیفوون لە نێوان نۆڕوێژ و سۆئێد و فەڕانسە قسەکراوە./
کاک وریا، تەنیا بووە، لە گەڵ ڕادیۆ ئاشتی و کوردسات، وتووێژی کردووە./
ئافیشی ڕێکلام جوان بوو./
٣- بەرنامە ڕێژی و بەڕێوە بردنی فستیواڵەکە چۆن بوو ؟
وەڵام :
دەبوو ریزی بەرنامەکە نووسرابا./
بەڕیوەبەران سەرکەوتوو بوون./
وەکوو هەموو بەرنامەیەکی کوردی کەم و کۆڕی هەبوو./
سەرەتا کۆمپیوتێرەکە، بۆ پێشاندانی فیلم گرفتی هەبوو، کە دواتر چاکیان کرد./
زۆر جوان بوو. / رێک و پێک بوو. /
بێهروز سیمنارەکەی بەڕێوە بردبا،بەڵام کەسێکی گەنجتر بایە باشتر دەبوو./
توانایی کاک بێهروز کورد ئەحمەدی، وەک بەڕێوەبەر، بە پەخشان و قسەی خۆش ئامادەبوانی لە گەڵ بەرنامەکە، ڕادەکێشا./
زۆر جوان بوو./ بە بوونی هونەرمەند و شاعیرانی ئامادە، دەکرا لەوانیش کەڵک وەربگیردرێ./ دەبوو زیاتر کولتووری کوردیان نیشان دابا./ ناوی ژنانی ناوداریان هێنابا، وێنەکانیان دانابان./ بۆ پرسیار، کاتی زیاتریان دانابا، خەڵکی زیاتر پرسیاریان هەبوو نەکرا./
لەبواری تێکنیکی هێندێک گرفت هەبوو، بەڵام ماوەی فستیواڵەکەش دوور و درێژ بوو. لە ٩،٣٠ هەتا ٤ی ئێوارە، سێ بەشەکە، هێندێک لە ئامادەبوانی ماندو کردبوو./
سەعاتی دەستپێکردنی زوو بوو./
ڕێکو پێک بوو./ باش بوو، بەڵام دەکرا باشتر بێ./ بەڕێوەبردنی بەرنامەکە زۆر باش بوو، کاک بێهروز زۆر بە توانا بوو./
لە بەڕێوەبردندا، موزیک جێگای بەتاڵ بوو، میکڕۆفۆنی تایبەت بۆ ئامێری مۆسقا نەبوو./ دەبوو پێشتر تێکنیک کۆنتڕوڵ کرابا./
لە سیمنارەکەدا، کاتی پرسیارەکان زیاتر بایە./ لە چوونە سەرو هاتنەخواردا، ناهەماهەنگی هەبوو./
گەورەترین هەڵە، ئاخرین بەرهەمی ماملێ،یە کە ئامادە کرابوو بۆ فرۆشتن و بڵاو کردنەوە داندرابوو، باسی لێنەکرابوو./
سێ دێی، مامۆستا هێمن ، بە دەنگی خۆی کە گەورەترین شاعیرە ، پاش چل ساڵ ئامادە کرابوو، بۆ فرۆشتن بە داخەوە باسی لێنەکراوە کە داندرابوو./
٩مانگ زەحمەت بۆ ئامادەکردنی ئەو دوو بەرهەمە کێشراوە، لە فستیواڵی ماملێ دا، باسی لێنەکرا، کەچی هەر ئەو مەڵبەندەش کاری بۆ کردبوو! /
زۆر کەسی دڵسۆز و شەریف، کاریان بۆ ئەو دوو بەرهەمە کردووە. لە سابڵاغێ ڕا بۆ باشور وهێنان بۆ ئاڵمان و شارەکانی دیکەش پاشان بۆ ستۆکهۆڵم ، کەچی سپاسی کەس نەکرا./
فستیواڵەکە سەرکەوتوو بوو، بە زانیاری هەمەڕەنگ و جۆراوجۆرەوە./
٤- ڕاتان لەسەر پێشوازی و ئامادە بوونی خەڵک چییە؟
وەڵام :
لەچاو بەرنامەی پێشتری لایەنە سیاسییەکان باشتر بوو./
دەبوو خەڵک زیاتر هاتبان و بەشداریان کردبا./ سەرەتا کەم بوو، پاشان قەرەباڵغ بوو./ ئامادەبوان، ڕازی و خۆشحاڵ بوون./
ساڵۆنەکە، جێگای ٣٣٠ کەسی هەیە، پڕ نەبوو./ زۆر باش بوو، ئامادەبوان بە دڵ و بە گیان حزوریان هەبوو./
کەمتر لە ڕادەی چاوەڕوانکراو بوو./ وەختیان نەبووە، کاریان هەبووە./
بەگشتی بە گوێرەی ژیان و گرفتاری خەڵکی ئێرە، باش بوو./
هەرچەند خەڵکی زۆر نەیان زانیبوو ، ڕێکلامەکەشیان نەدیبوو باش بوو./
ئامادەبوان، بە تامەزرۆیی هاتبوون، هەموویان پێیان خۆش بوو، بە ڕێز و حورمەتەوە پێشوازیان لە ئاهەنگەکرد./
نزیکەی ١٢٠ کەس بەشدار بوون، پێشوازیان زۆر باش بوو./
نزیکەی ٢٥٠/٢٠٠ کەس هاتبوون، کارەسات بوو./
کەسانی ئاگادار و عەلاقەمەند بە هونەری ماملێ و خالەقی بوون، لە کۆتاییشدا، بە خۆشییەوە خەڵکی ڕەزایەتیان هەبوو، کاک مەزهەریش، ڕازی بوو./
لەو ٢٥٠ کەسەی هاتبوون، ڕادەی ٣٠ دانە سێ دێ و ٨ کتێب فرۆشراوە./
ئەو خانمەی کە فرۆشیاری بەرهەمەکانی ئەنیستیتۆ بوو، نزیکەی ٢-٣ هەزار کڕۆنی فرۆشت، ئەویش زیاتر عەکس/ وێنەکانیان دەکڕی.
٥- کەم وکۆڕی دیکەی ئاهەنگەکە چی بوون؟
وەڵام :
کاتی بەرنامەکە، زۆر بوو. / گیرو گرفتی کۆمپیوتێرەکە ، هێندێک ڕیزی بەرنامەکەی گۆڕی. / هیچ بەرنامەیەک بێ کەموکۆڕی نییە، بەڵام ئەو ئاهەنگە لە چوارچێوەی خۆیدا، ٩٠٪ سەرکەوتوو بوو./ کامپیوتێرەکە هی ساڵۆنەکە بوو کە فۆرماتی فیلمەکەی نەدەخوێندەوە، دواتر هی دیکەیان هێنا فیلمەکە پێشاندرا./
مامۆستایان ماملێ و خالەقی، بە هونەری گۆرانییەکانیان ناسراون، دەکرا نێوئاخنی بەرنامەکە بە گۆرانییەکانیان پڕکراباوە، بەتایبەتی لە کاتی پشوودان و پێشانگای کتێبدا، یان کاتی تێکچوونی بەرنامە ، هەروەها لە سەر وێنەکانی کلتوری کوردەواری ، زۆر خۆشتر و ڕازاوەتر دەبوو./
کاتێک وێنەی ئاهەنگی نەورۆز و سروشتی کوردستانیان پێشان دەدا، دەبوو ناوی وێنەگرەکانیان لە سەر نووسرابان یان ئاماژە بە ناوی ئەنیستیتۆی کوردی کرابا و مافی وێنەگران پارێزرابان./
سپاسی بەشداران بە تایبەتی لە هونەرمەندان و شاعیرانی ئامادەبوو کرابا./
فاروقی فەرهاد، یارمەتی فرۆشتنی کتێب و سێ دێی کرد، سپاسیان نەکرد./
بە خەڵکیان ڕانەدەگەیاند و هانیان نەدەدان کە بەرهەمی خۆیان بکڕن./
گلەیی ژنان، سەبارەت بەو کەسانەی کە بانگ کرانە سەر شانۆ، لە کۆتاییدا سپاسیان کردن./
گلەیی کاک مەزهەر لە ئامادەبوان، پرسیار نەکردنیان سەبارەت بە شتەکان بوو./
بەشی هونەری و موزیکی زیاتر پێویست بوو./
٦- پێشنیارتان بۆ ساڵی داهاتوو چییە ؟
وەڵام :
بەرنامەی بەخشینی خەڵات، هەڵوێستێکی ژیرانە و ئەرکێکی پیرۆزی مرۆڤانە و نەتەوەییە./ کارێکی گشتییە و پێویستی بە هاوبیری هەمە لایەنەی پسپۆرانەی بێ لایەن و بێ غەرەز و بێ کێشەی دەوێت./
بەردەوامی چالاکی ئەو ئەرکە گرینگە، لە بواری مادییەوە بۆ بنەماڵەی ماملێ ، فشار و قورسایی زۆرە . بە ئیمکاناتی شەخسی و بنەماڵەیی زەحمەتە و بێ کەم و کۆڕی نابێت./
بۆیە پێویستە کە لەگەڵ حکوومەتی کوردستان هەماهەنگی بکرێت و پێداویستییەکان بە پشتیوانی دەوڵەتی دابین بکرێن./
پەیوەندی بە کەسانی شارەزا و پسپۆری موزیک و بوارەکانی هونەری بکەن، ڕێگە بە گەنجانی بە توانا بدەن./
بۆ بەڕێوەبردنی بەرنامە لە دەرەوە، چەند وەرگێڕ دیاری بکرێت. ئەویش پێشتر بە هەماهەنگی بۆ وەرگێڕانی دەقەکان ، مەسەلەن باسی سیمنار بە شارەزایی./
ئامرازی تێکنیکی پێویست ، پێشتر دیاری و تاقی بکرێنەوە./
شایستەیە بە بوونی ژنانی زانا و پسپۆر،کە توانای هاوکاری و قسە کردنیان لە سەر ناوەرۆکی بابەتی بەرنامەکان هەبێت، بەشدار بکرێن./
ساڵی داهاتوو ئەگەر هونەرمەندی شایستەی ژن هەبێت، خەڵات بکرێت./
ریزی بەرنامەکان بە گوێرەی پێویست و ڕەچاوی کەم و کۆڕی و ڕخنە و پێشنیارەکانی گونجاوی ڕابردوو، بە وردی دیاری بکرێن و ئەرکەکان دابەش بکرێن ./
پێشوەخت بە هۆی مێدیاکانەوە، بە چەند جار ڕێکلام و ئاگاداری ڕێک و پێکی بۆ بکرێت./
پرسیاری ڕاپرسی بەرنامەکانیش، بۆ باشتر بوونی بەردەوام ، پێشتر بە نووسراوە ئامادە بکرێن و بدرێن بە ئامادەبوان و داوای پڕکردنەوە و گەڕاننەوەیان بکەن./
لە کاتی بەڕێوەچوونی بەرنامەشدا، پێویست بە چەند چاودێر دەکات کە کۆنتڕۆڵیان هەبێت، ریزی بەشەکان نەزمی هەبێت، و هیچ لە قەڵەم نەکەوێت، یان بە گوێرەی هەڵکەوت و ناچاری، ئاڵتر ناتیوی لەبار و خێرایان هەبێت./
هەموو ساڵێک بۆ دەنگ دانەوە و ناساندنی ، لە ناوەو ە و لە دەرەوەش بەڕێوە بچێت./
بە بێ جیاوازی و زیاتر دێموکڕاتتر خەڵات پێشکەش بە هونەرمەندانی هەموو پارچەکان بکرێت./
ئەگەر قەرار بێت بەخشینی خەڵات لە داهاتوو دا، لە باشور ، یان شوێنی دیکەی وڵات بەڕێوە بچێت، دیارە بە گوێرەی جێگا و ئیمکان و دیاری کردنەکان، ئاڵ وگۆڕی بە سەر بەرنامەکانی ڕابردوو دا دێت./
بۆ وێنە ئەگەر وەکی ئێرە بەرنامەکە چەند بەش بێت، دەکرێت کە بەشی بەخشێنی خەڵات مەبەستی سەرەکی ڕۆژی دیاری کراو بێت./
خەڵکی دەتوانن لە ڕۆژانی دیکە دا سەردانی پێشانگا یان شوێنی چالاکی دیکە بکەن./
وا باشە کە سەرجەم فستیواڵەکان لە دەرەوە ، بە تایبەت لە ستۆکهۆڵم بەڕێوە بچن. ئەو ساڵ ئەزموونێکی باش بوو، لە داهاتوودا زۆر باشتر دەبێت و ناوبانگی پتر دەبێت./
بە ڕای کەسایەتی کورد کە لە ناوخۆ بەشداری لە فستیواڵەکانی پێشوو کردووە، کەم و کۆڕی زۆر بووە ./
لە کوردستان هەموو شتێک لە لایەن ئەندامانی بنەماڵەی ماملێ کراوە. هەوڵەکەش ئەوەیە کە ئەگەر داوا لە حکومەتی کوردستان بکرێت، پشتیوانی مادی و مەعنەوی بۆ بەڕێوە بردنی فستیواڵەکان لە ستۆکهۆڵم تەرخان بکرێت./
بە پێچەوانەش بە هاوبیری و هاوکاری گشتی، بە دانانی فۆند، و حەقی ئەندامەتی هاووڵاتیان لە دەرەوە، دەرچووی پێداویستییەکانی فسیتواڵەکان دابین بکرێت./
٧- ئەگەر ڕا و بۆچوونی زیاترتان هەبێت ؟
وەڵام :
هەوڵبدرێت بۆ بەڕێوەبردن لە لاوانی پسپۆریش کەڵک وەربگرن./
هەوڵدان بۆ ناساندنی کولتوور و سەربەخۆیی خۆمان ، کە دوژمنان، نەتوانن لەوە زیاتر بەرگریمان لێبکەن./
دەبوو چەند قات بۆ ئەو فستیواڵە سپاسی خەڵکی یارمەتیدەر بکەن./
بۆ داهاتوو سەرنج بدەن کە دەبێ سپاسی خەڵک بکەن./
هیوای بەردەوامی و ئەرکی فەرهەنگسازییە، بە هەموو هونەرمەندان ڕابگەن./
حکومەتی کوردستان پشتیوانی بنەماڵەی ماملێ بێت و یارمەتیان بدات کە لە پانتاییەکی گەورەترو لە هەر چوار پارچەی کوردستان هونەرمەندان یارمەتی بکرێن./
بۆ چی ڕادیۆ زایەڵە ، هیچ یارمەتێکی ڕاگەیاندنی نەکرد و هەواڵنێریشی نەهاتبوو. /
بۆ چی فیدراسیۆنی کۆمەڵە کوردستانیەکان ، هیچ پشتیوانی و بەشدارییان نەبوو. /
بۆ چی ناوەندی ڕۆشەنبیری ڕووناکی، هیچ پشتیوانی و بەشدارییان نەبوو. /
زۆر باش دەبێت ئەگەر تلەویزیۆنێکی کوردی سەرجەمی فیلمی فستیواڵەکە پێشان بدات./
هاتنی بەڕێز دوکتور سالار عوسمان، جێگری وەزیری رەوشەنبیری لە لایەن حکومەتی کوردستان بۆ بەشداری لەم فستیواڵە و هێنانی دوو دیاری بە نرخ ” فەڕشی دەستچن بە نەخشی ئاڵای کوردستان بۆ مەڵبەندی هونەری ماملێ و قابێکی هەڵكەندراو بۆ بەڕێز مامۆستا خالەقی، بوو بە هۆی خۆشحاڵی و بە تایبەت قسە بەنرخ و ئومێد بەخشەکانی بە شایستەیی دەگەڵ ڕەزامەندی و شانازی ئامادەبوان بەرەو روو بوو.
لە کۆتاییدا هیوای سڵامەتی ، شادی و سەربەرزیتان بۆ دەخوازم
لەگەڵ ڕێز و خۆشەویستیم
براتان ئاسۆ موکریانی
٢٠١٧ /٠٦ /١٠
ئاڵبۆمی ڕێژنە
دوایین بەرهەمی محەممەد ماملێ

بۆ کڕینی ئۆرجیناڵی ئاڵبۆمی "ڕێژنە"، دەتوانن پێوەندی بەم ئیمایلەوە بکەن:
info@mamle.net
هەروەها بۆ گوگرتنی ئانڵاین دەتوانن کرتە لەسەر وێنەکە بفەرموون.

لالە بە دەستان
هاشم نانەوازادە

بۆ خوێندنەوەی ئەم پەرتووکە دەتوانن کرتە لەسەر وێنەکە بکەن.

گۆرانییەکانی ماملێ

Here is the Music Player. You need to installl flash player to show this cool thing!